Ap ka apot Lapang ia u Mukul ruh

Ym don ba lah ban len ba ha ki bun ki bynta u chief minister bathymmai ka Meghalaya, u Dr Mukul Sangma, u lah ban long uba kham shemphang ban ia u chief minister ba dang shu leit noh, u Dr D D Lapang.Hynrei ha ka politics Meghalaya, kumba ka paw haduh mynta, kaba u nongialam u donkam eh ka dei ym tang ka jingshemphang ha ka jingtip ban trei kam bad ban sngewthuh kham bha ia ki kynjnit kynjnat jong ka synshar ka khadar, hynrei ban long uba shemphang bad uba la ngam jylliew bha ha ki thwei bajngum jong ka politics Meghalaya kum u Dr Lapang.
Haoid na ka liang jong u Dr Lapang, kum u politishan uba la ih bha, u la pynpaw ia ka jinglong khraw jingmut ne jinglong ‘magnanimous’ jong u da kaba pdiang hun ia ka rai jong ki MLA ba kham bun, bapynlong ia ka Congress Legislature Party (CLP), da ka jingai noh jong u ia u snieh lakam jong ka kam chief minister sha u Dr Mukul Sangma ha ka miet jong ka Sngi Nyngkong, ka 19 tarik u Iaiong, 2010, shen hadien ka jingwan phai jong u na Delhi ban iakynduh ia ka President jong ka seng Congress, ka Sonia Gandhi, bad ioh ai ha ka ia ka shithi iehkam noh jong u kum u nongialam jong ka CLP bad u chief minister jong ka Meghalaya.Kum u politishan uba la kham ih bad kham iaw, u Dr Lapang u la iohi lypa lehse ia ki dak ki shin na ka lyngrum-rah ne ‘debri’ ba ki ‘eriong bad ‘erlangthari jong ka politics Meghalaya, khamtam jong ka seng Congress, ka la shat kynting la kumba ar bnai tam shwa da ka jingiakynduh bad jingiasylla nyngkong jong ki 14 ngut ki MLA ka seng Congress ban dawa na ka Congress High Command ban weng noh ia u kum u nongialam jong ka CLP kaba mut ruh na ka kam chief minister jong ka jylla.
Ka jingweng ia u Dr Lapang na ka kam chief minister ka la dei ban wan kham kloi, hynrei namar ka jingwan noh jong ka ‘assembly session’ ia ka apot kaba u Dr Lapang u la dei ban iakynduh la pynsangeh noh shipor haduh kaba kut jong ka dorbar mang tyngka, ba la long ha u ‘nai Lber jong une u snem 2010.
Lalah ban sngewthuh ia ka jingjur jong ka jingpyrshah ia u Dr Lapang namar ym shym slem hadien ba wai noh ka dorbar mang tyngka jong ka Assembly, ki MLA ba pyrshah Lapang ym tang ba ki bteng biang ia ka jingiakhih jong ki, hynrei nang kham pynkhlain ruh ia lade da kaba ioh shuh ki MLA Congress ban kyrshan ia ki.
Ha kine ki ar bnai tam jong ka jingiakhih ki MLA Congress ban weng noh ia u Lapang kum u nongialam jong ki, kine ki nongiakhih ki la pynmih ruh katto katne ki kyrteng, kum ka jong u Speaker ka Meghalaya assembly, Bah Charles Pyngrope, u Dr R C Laloo bad u Bah Rowell Lyngdoh kum kita kiba lah ban mih bujli ia u Dr Lapang ban long chief minister.
Namar kaba paw hi sha pyrthei ka pyni ba u Dr Mukul Sangma u don sha ka liang jong u Dr Lapang, ia ka kyrteng jong une u rangbah kum uwei na ki ‘aspirant’ ne ba don jingangnud ioh long chief minister ym shym la pynpaw eh haduh katta.
Hynrei wat lada kam shym long kumta, na ka liang jong u Dr Mukul Sangma, bad u Dr Lapang u tip ruh lehse ia kata, um shym da long mynsiem ba palei ne bym don jingbna eh haduh katta. Na ka liang jong u ruh, kumba u Dr Lapang ruh u tip ia kata, u la wad bad thaw lad kumno ban ioh iasyllok bad ki MLA pyrshah Lapang, kiba ha ki sngi bad taiew shwa ka dorbar mang tyngka ka assembly ki la don ha Delhi.
Dei ha kito ki sngi, bun kin kynmaw ba u Dr Mukul, da kaba leh mynleh leit iakynduh ia u Union Home Minister na ka bynta ban nang bteng ka jingiasangeh iasiat ka ANVC bad ki bor pulit ka Meghalaya, u la leit Delhi ym tang ban iakynduh ia u Union Home Minister, hynrei wat ban iasyllok ruh lehse bad ki MLA pyrshah Lapang.
Na ki daw ba tip hi tang ma ki, u Bah Charles Pyngrope, u Dr R C Laloo bad u Bah Rowell Lyngdoh, ka paw ba kim shym don ‘inclination’ ne jingpynnoh ban mih bujli ia u Dr Lapang bad kumta da ka jingkynran dien noh jong ki ia ka rynsan la pynlait ban ioh ieng noh tang u Dr Mukul.
Kumba ka paw na ka jingjied bad jingkubur ia u ban long u nongialam thymmai ka CLP bad uban mih bujli ia u Dr Lapang kum u chief minister bathymmai ka Meghalaya, u Dr Mukul ha kaba khatduh iawai u la ioh ban pynurlong ia ka jingthmu bad jingangnud ba la slem jong u.Katto ba u la ioh ban pynlong kam ia kaba u la don jingthmu la slem, u Dr Mukul un dang dei ban ryngkang bun bah ki dieng pynkiang ba la pynap ym da dei than da ki seng liang pyrshah kum ka NCP, hynrei da ki para MLA Congress jong u hi.
Ia kane la lah ban pynshisha ha ka sngi shim jingsmai jong u kum u chief minister bathymmai jong ka Meghalaya ha iing u lat ha ka Sngi Ba-ar ka 20 tarik u Iaiong, 2010. Ha kane ka sngi, lait na u, ki lai ngut ki minister ba la shim jingsmai ryngkat bad u, u Bah Bindo M Lanong, u Bah J A Lyngdoh, bad u A T Mondal kim dei na ka seng Congress hynrei ki bar seng.Ka jingkylli kaba ki babun ki kylli ka long balei, lait na u, ym shym don kiwei kiwei ki minister Congress? Namar ba ka long kumne, sha ka pyrthei ka paw kumba dei ki party bym long Congress kiba don ka bynta ba kham kongsan ha kane ka sorkar ba mynta.
Kaba u Dr Mukul Sangma u donkam ban leh mar mar ka long ym tang ban jied pynkloi noh ia ki minister na ka liang jong ka Congress, hynrei ban bat ruh ia ka juban lak kaba ka seng Congress ka la khlei ha ka por ba ka iasyllok nyngkong bad ki regional party bad indipenden ha ka por ba pynlong ia ka Sorkar Meghalaya United Alliance (MUA).
Na ka liang jong u kam dei ban don kano kano ka jingbuhrieh. U dei ban trei bad ban kren ha ba shai bad ruh da kaba long ‘accountable’ ne ba lah ban ai jingkhein na ka bynta kawei pa kawei ka rai ba u shim, lym kumta u ruh un hap ha ka juh ka apot kaba u Dr Lapang u don mynta.