Yn sdang mareh u Bolt ia ka 100m ha S.Korea

RALEIGH (North Carolina) : U lahduh ha ka pyrthei bad ha ka Olympic u Usain Bolt un sdang ia ka jingai reng jong u ia ka 100 meter mynta ka snem ha Daegu, South Korea ha ka 17 tairk u Jymmang, pynthikna u manager jong u bad ruh ki nongpyniaid ia kane ka jing iakhun.
Kane kan dei ka race kaba nyngkong eh jong u Bolt mynta ka aiom bad ka sien kaba nyngkong ruh ba un iuh kjat ha South Korea, iathuh u ejen jong u Ricky Simms. Hadien kane, u Bolt un aireng sa ia ka 200m ha ka Shanghai Diamond League ha ka 23 tarik u Jymmang.
U Bolt u bat ia ka World record ha ka 100m (9.58 sekons) bad kumjuh ruh ha ka 200 meter (19.19 sekons), bad ia kine ki rikod u la shna ha ka World Championships kaba la long ha Berlin ha ka 2009.
Ka jingleit aireng jong u Bolt ha kane ka jingia mareh 100 meter ha Daegu ka long namar ba u kwah ban tip kham bha ia ka jinglong kane ka jaka khnang ba un ioh ban pynkhreh na ka bynta ka World Championship 2011 kaban long ha kane hi ka jaka ha ka 27 u Nailar haduh 4 u Nailur. U Bolt u la pynthikna ruh ba un aireng ha ki 8 tylli ki race ha kane ka 2010.
Une u nongmareh thong , 23 snem ka rta, un ialam ia ka kynhun Jamaica ha ka jingiamareh 4 X100 m relay ha ka lympung iakob Penns relays ha Philadelphia Nangat unsdang pat ia ka jingiamareh ba shimet jong u ha ka 200 meter ha ka jingia kob kaban long ha Kingston ha ka 1 tarik u Jymmang. Hadien ki race ha Daegu bad Shanghai, u Bolt un aireng bad pyrshah ruh ban shna ia ka world record kaba thymmai ha ka jingiamareh 300 meter kaban long ha Ostrava, Czech Republic ha ka 27 u Jymmang.
Haba ia dei pat bad ki jingiakob Diamond League kiba u Bolt u thmu ban aireng mynta ka snem ki long ha New York (12 Jylliew), Paris (16 Jylliew) bad Brussels (27 Nailar). Ha baroh kine ki race un aireng tang ha ka 100 meter. Ki lai tylli kiwei pat ki Diamonds League kiba u thmu ban ia shim bynta yn sa pynbna hadien.