Pynianujor lada la thep 1000 kol : Pele

SAO PAULO : U player uba khraw nam eh ha ka pyrthei, u Pele jong ka Brazil, u la kyntait ban mynjur ba ka sap jong u Messi ka ia ryngkat kyrdan bad kito ki player kiba kynsai tam ha ka juk kaba la leit bad ong ruh ba kum kine ki player lah ban ia nujor ia ka kyrdan bad u tang lada ki la lah ban thep 1000 kol kumba la lah ma u.
U Messi uba long u nongjop ia ka khusnam Ballon d ‘Or bad ia ka World Player of the Year, u la paw bha ha ki jingiakhun kiba u la mihkhmat na la ka club ha kaba u la iohthep haduh 40 kol na ki 44 tylli ki jingia khun kynthup ruh ia ki saw kol dang shen ha ka quarter final jong ka Champions League pyrshah ia ka Arsenal. Ia ka sap jong u mynta la ia nujor bad ki player kiba khraw nam eh ha ka juk kaba la leit kum u Pele bad Maradona.
Hynrei u Pele u la pynpaw ia ka jingartatien ba u Messi u don ha kata ka kyrdan kaba u la ju bat teng mynshuwa bad ngeit skhem ba lada don kano kano ka jing pynianujor ia u bad u Messi, u ong ba une u player jong ka Argentina u dei ban thep shuwa 1000 kol kumba la leh ma u ha ki por ba u dang ialehkai ha ki snem 1950-70. U ong ba ki briew ki ju kwah bha ban pynia syriem ia ka sap jong u Messi bad ka jong u hynrei ba ma u pat um sngew iahap satia hangno hangno ruh.
U Pele u la iathuh ruh ba u ju ia biria kai bad ki paralok na Argentina ba lada ki kwah ban jied ia u player uba ia ryngkat kyrdan bad u ki dei ban jied shuwa ia u best player na ri ong ki bad lada don uwei na ki uba lah ban thep ia ka 1000 kol, bad uta ngan mynjur ban pyniasyriem ne ia nujor ia ka sap jong nga.
U Pele u ong ba u Messi u ialehkai bha shi katdei bad ka Barcelona, hynrei um ju paw pat ha ki jingiakhun kiba u mihkhmat na la ka ri. Tharai u ong ka lah ban long ba ha kane ka World Cup ngin sa iohi ia ka sap jong u kumba u la pynpaw bad ka club. Ia kane, u Pele u ong ngin ap bad ngin sa peit.