Hato ka BJP kan pyniap noh ia ka Women’s Reservation Bill?

NEW DELHI : Ka President seng Congress ka Sonia Gandhi ka la iathuh ha ka kynhun ki kynthei ba ha ki jingiohi jong ka ym dei u Lalu Prasad lane u Mulayam Singh Yadav ban pynpulom ia ka ain ban ai bhah kyrpang ia ki kynthei ba kin long ki nongmih khmat sha ki iingdorbar thaw ain ba la tip kum ka Women’s Reser-vation Bill, hynrei ka BJP.
Ka kynhun ki kynthei ki la leit ban kylli na ka Sonia lano ka Lok Sabha kan pyllait ia kane ka ain. Ka Sonia ka la ong ba ka BJP ka la lehkai bad ha ka jaka ba kan kyrshan tylli ia ka Bill kumba ka la khlei, ka la jied ban ia beh ia ka rabit kum ki sewbeh ban tyngshai ha ka politik.
Nalor kata, ki jingia shrut hapdeng u nongialam Liangpyrshah ka Rajya Sabha u Arun Jaitley bad ka nongialam Liangpyrshah ka Lok Sabha ka Sushma Swaraj, kaba kynthoh ia u Jaitley ba u la tuh ia u lakam da ka jingsngew mynsiem jong u ia kane ka bill haba ka Rajya Sabha ka la pass ia ka hapdeng ki jingpynkhihwin bad hylla ha u bnai ba la dep.
Ka bor bad ki ‘liewlep
** U Myntri ka sorkar kmie u Shashi Tharoor u dei uba lait ktien bad pnah eh ban kren. Hynrei kawei kaba la tih liewlep ia ki jingkren jong u ka dei ka sohkyrdot ki jing ialehkai kriket IPL ha Kochi. U Tharoor u la pyniap nia da lade ia lade. Ki Liang Pyrshah ki la kem daw bad rah ha khmat u Myntri Rangbah duh Manmohan Singh. Ha ka iingdorbar Parliament ki la set kak ia ka jingkren jong u ba u ia ksaid ban pynksan ia lade. La shah ia u Tharoor tang ban pule ia kaei kaba u la ai khubor ha ki lad pathai khubor ha bar ka Parliament.
Ka jingsneng ia u Gadkari
** U president ka BJP u Nitin Gadkari u kham jied ia ka stai u Atal Bihari Vajpayee ha ki jingbiang por, ban ia ka lynti Hindutva u LK Advani. Hynrei u Ashok Tandon uba dei u director ka skulbah Makhanlah Chaturvedi National University of Journalism and Communi-cation, u la ong ba um treh ban iehnoh ia kane ka kam bad rung ha ka kynhun u Gadkari, hynrei un shu long noh tang u nongaibuit. U Gadkari dang shen u la leh kyrtong bha ban iakren bad ki editor kot khubor na ka kynhun Editor’s Guild of India hynrei u la hap pan map kylla ba u la poi slem 10 minit na ka por ba la buh. Ka daw : ba ka helicopter ka la phiel banmih ha ka por na Haridwar ka jaka ba u leit ngam um bad u khlem poi pyrkhat tat haduh ba la dier ka por.
Bun ktien u Nitish Kumar
** U myntri rangbah ka jylla Bihar u Nitish Kumar , uba la aibuit ia u myntri ka Sorkar India u P. Chidambaram ba um dei ban kren bun ktien eh ha ki jingiakhun ka sorkar ia ki lehnoh Maoist, hynrei ia lad pat u khlem tyngkai ban kren pynbtai ha kane ka taiew kaba la dep.
Ha ka jingialang bad ki nongthoh khubor kynthei ka India, u Nitish Kumar u la kren haduh 2 kynta ban batai ia ki jingma ki Maoist da kaba batai ia shibun ki ain (bill) ka BJP katba u dang kren ki nongshondur ki la krad ba la lut ki phlim. Ki nongthoh kot khubor ruh ki la sangeh ka thoh da kaba ong ba ka jingia lang ai khubor ka la kylla sha ka jingiatainia ka bym don pasoh ei ei.
Kren shibun ki thylliej
** Ka Nirmala Sitharaman ka dei ka kynthei nongaiktien ba nyngkong eh ka BJP na shatduh ka ri India, kaba pnah thylliej bha ban kren ia ka ktien Tamil , Telegu, Phareng bad hindi. Ka sngewthuh bha ruh ia ka ktien Mulayalam bad Kanada. Ka jingpaw jong ka ha ki jingkren ha ka skul bah Jawaharlal Nehru University ka la phlang ha bun ki seng bad ki shanel telebishon ha South India.