Ther ka Agatha ba sahdien ki jylla Dong Mihngi

Khubor Dongmusa
SHILLONG : Ka Myntri Rural Develop-ment ka Sorkar India ka Agatha Sangma ka la ther tyngeh ia ki jylla Dong Mihngi namar ki jingsahdien ha ka roi ka par wat haba ka sorkar India ka la theh shibun ka tyngka na ka bynta ban pynroi ia ki thain nongkyndong khamtam eh kiba dang sahdien sah haduh mynta.
Ka Agatha ka la kren ia kane ha ka jingialang halor ka phang kaba ong India Advantage lane ka jingroi stet ka India kaba la long ha New Delhi dang shen. Ka la ong ba ka thain Dong Mihngi kam don dak don shin ha ka roi ka par bad kane baroh ka dei na ka daw jong ki jingbym trei kam ki sorkar jylla ba kane ka thain ka la don sah ha ki jingsahdien.
Ka Agatha ka la ong ba ka sorkar kmie ym dei tang ba ka la theh spah theh phew ka bym tip shuh sha kine ki jylla,bad bunsien ka la nang kham pynheh ruh ia ki jingai pisa haduh ban da biang. Kane ka Myntri kaba dang khynnah tam na baroh ha ka sorkar India, ka la sngewsih shibun eh ba ki sorkar jylla ki la phiel ban pyndonkam hok ia ki skim ka sorkar kmie bad kiba bunsien ki la shim ia ka kabu ban kynnoh kylla ia ka sorkar kmie halor ki jingsahdien ka Dong Mihngi. Kiwei pat ki nongkren ha kane ka seminarki la kynnoh ba dei ka “bamsap” kaba kongsan eh kaba khanglad ia ka roi ka par ha ki jylla ka thain Dong Mihngi.