Shah weng u Bah Paul Lyngdoh sa 8 ki Minister beit na ka Congress

Khubor Dongmusa
SHILLONG : Da ka jingthmu ba u Chief ba dang shu shah pynsmai, u Dr Mukul Sangma u don ban thung shuh sa phra ngut ki minister, ka jinglynga ki katto katne kan kut bad ka jingpisa bad jingsat jong kito kiba shah ieh kan sa sdang.
Lada ki jingtip ba ioh na ki tyllong khubor kim bakla baroh ki phra ngut ki minister kiba u Dr Mukul u thmu ban thung ki dei na ka seng Congress.
Na ki jingtip ba la ioh lum ki phra ngut ki minister ba u Dr Mukul un thung kin kynthup ia u Bah Prestone Tynsong, u Martin M Danggo, ka Kong Ampareen Lyngdoh, u H D R Lyngdoh, u F W Momin, u Bah Rowell Lyngdoh, u Bah Shitlang Pale, u Bah Sniawbhalang Dhar lane u Sayeeddulla Nongrum.
La sngewthuh ruh ba u Bah Rowell Lyngdoh un ioh ia ka kyrdan Deputy Chief Minister.
Kaba kham pynbynniaw ia ki ‘riewpeit pyrman babun ka dei ka jingieh noh jong u Dr Mukul ia u Bah Paul Lyngdoh jong ka KHNAM na ka kynhun ki minister jong u.
Bun ki nongpa-thai khubor bad riew peit pyrman ki ong ba u Dr Mukul u lah ban babe hadien na ka bynta kane ka jingleh jong u ka bym iadei dur eiei bad ka rukum pyrkhat u Dr D D Lapang uba la kren shai ba ka seng Congress kam dei ban klet ia kito kiba la iarap ia ka ban pynlong ia kane ka sorkar Meghalaya United Alliance (MUA) ba mynta.
La kine ki MLA Congress kiba u Dr Mukul u thmu ban pynlong minister, hadien ba u ioh ia ka jingkubur jong ka Congress High Command, kin wanrah jinghun ne em ia kiba bun balang jong ka seng Congress bad paidbah babun jong ka Meghalaya yn dang dei ban tip.
Kaba thikna ka long, pynpaw ki ‘riew peit pyrman babun, ka ba kane ka jingjied minister thymmai jong u Dr Mukul ym tang ba kan ym pynhun ia kiba bun, hynrei wanrah biang ka jingshong syier ia kane ka Sorkar ruh kaba pher tiak ka lah ban shah pynkhyllem tang hapoh katto katne bnai.
Bun kiba kyndit ban iohi ba u Dr Mukul u ‘drop’ ia u Dr RC Laloo bad ia kito ki indipenden kiba u Dr Lapang u la ialeh shitom ban wanrah na ka bynta ba ka seng Congress kan ioh ban pynlong ia kane ka Sorkar MUA ba mynta.
Don ki ‘riew peit pyrman kiba ong ba u Dr Lapang u sat bha ia u Dr Mukul bad kumjuh ruh ia ki katto katne ki heh Congress ha Delhi kum ki jong u Oscar Fernanedez, u Luizinho Faleiro bad wat ia u Ahmed Patel u Political Secretary jong ka Sonia Gandhi kiba la pynduh lad ia u Dr Lapang ban iakynduh ia ka Congress President ka Sonia Gandhi.
“Dei tad ynda ki la thikna ba u Dr Mukul u la ioh ia ka jingkyrshan ba u donkam bad ba u la thikna ban ioh pynlong sorkar, ba kine ki heh Congress ki plie lad ia u Dr Lapang ban iakynduh ia ka Sonia Gandhi bad kata ruh tang na ka bynta ba un ioh ai ia ka shithi iehkam jong u,” ong ki tyllong khubor.
Kiba bun hi ki sngew ba u Dr Lapang, uban sa shah thung kum u Political Adviser jong u Chief Minister, un ym shong kli kti hynrei un sa wad lad wad lynti ym tang ban pynkhyllem ia u Dr Mukul, hynrei ban wan biang sha ka bor.
Bun ki sngew ba ka jingtlot jong u Dr Mukul, ka jinglong hangamei jong u bad na kiwei kiwei ki daw, kin sa nang pynkhlain ia u Dr Lapang uba shen un sa sdang ban ban ‘mobilise’ ia ki nongkyrshan jong u kham tam ia kito ki MLA Congress kiba u Dr Mukul u la kyntait.
Kumba lah ban sngewthuh na ki tyllong khubor u Dr Mukul u la leit sha Delhi ha ka Sngi Balang, ka 21 tarik u Iaiong, 2010, na ka bynta ban ioh jingkubur na ka bynta ki minister ba thmu ban thung na ka Sonia Gandhi.
Kito kiba la leit bad u, ong ki tyllong jingtip, dei u MPCC President, u Bah Friday Lyngdoh, u MPCC President barim u O L Nongtdu bad u Francis Pondit R Sangma.
Lada ka iaid katkum ka plan jong u Dr Mukul, ong ki lad ioh jingtip, ha ka Sngi Thohdieng lane Sngi Saitjain ban wan lah ban don biang ka jingpynsmai minister ha kaba ia ki phra ngut ba la jer kyrteng haneng yn thung minister.