Pynsyier pynlynga u Bindo ia u Mukul

Khubor Dongmusa
Khubor Dongmusa
SHILLONG : Tip haduh katno u chief minister thymmai ka Meghalaya, u Dr Mukul Sangma, u la kyndeh ka dohnud, hynrei kaba thikna ka long ba u Bah Bindo M Lanong, u la pynsyier la biang ia u da ka jingwan poi slem jong u kumba ar minit eiei sha ka jingpynsmai minister ha Raj Bhavan ha Shillong hynnin ka sngi, ka 20 tarik u Iaiong, 2010.
U Dongmusa uba la iohi ia ka jinglynga pisa jong u Dr Mukul, u la kylli ia u Bah Bindo ynda u la wan la u long ne em uba sngewtynnad peit ia ki film pynngiew jong u nongringdur sinema ba paw nam u Alfred Hitchcock?
“Balei?” la kylli U Bah Bindo. “Nga kylli namar phi la pyn ‘suspense’ la biang ia u Dr Mukul da ka jingwan slem jong phi,” la pynshai u Dongmusa.
Na ka bynta katto katne por ka la paw shynna ba u Dr Mukul u la pisa lynga haba u la iohi ba ka por ka la dap bad ba u Bah Bindo ym shym pat wan.
Mar ia iohi ba u Bah Bindo u la wan poi shngain biang ka khmat u Dr Mukul. “Na ka bynta katto katne por u la artatien imat ba u Bah Bindo un wan,” ong kito kiba la iohi.
Ka jingpisa lynga jong u Dr Mukul kaba haduh katta ba u la kylli ruh ia u Bah J A Lyngdoh “Where is Bindo?”
U Dr Mukul u la dei hi ban syier bad ban lynga namar, lait na lade, ki minister ba shim jingsmai hynnin ka sngi, ka 20 tarik u Iaiong, 2010, ki dei tang na ka UDP ar ngut, u Bah Bindo bad u Bah J A Lyngdoh, bad u A T Mondal u indipenden.